Sauðburðarsæla

Gott og blessað kvöld !

Jæja þá er maður kominn endurnærður úr jökuldælskri sauðburðarsælu. Eyddi stærstum tíma í fjárhúsunum að sjálfsögðu því það er þar sem hlutirnir gerast á þessum árstíma. Ekkert sjónvarpsgláp fyrir utan Júróvisjón auðvitað, engin nettenging svo bloggið og fjésbókin fengu hvíldina.

Nú eru náttúrulega allir búnir að blogga yfir sig um annað sætið í Moskvu en ég verð að fá að segja að það kom mér skemmtilega á óvart að Jóhanna Guðrún kæmist svo hátt. Laginu fannst mér fremur litið flaggað hér heima fyrir keppnina miðað við oft áður en stelpan gerði þetta glæsilega og það skilaði sér svo sannarlega. Hjartaknúsarinn norski stal gjörsamlega senunni en það kom ekki á óvart. Þvílíkur sjarmi og hæfileikar ! Ég og heimasætan erum staðráðnar í að skella okkur til Norge næsta vor og taka þátt í ævintýrinu sem Alexander Rybak færði þjóð sinni daginn fyrir þjóðhátíðardag Norðmanna. Það verður gaman að koma á gamlar heimaslóðir.

Að komast í sveitina var yndislegt. Ég og litla skrudda vorum á ferðinni allan daginn og stundum langt fram á kvöld  að sinna búskapnum ásamt fleirum. 

Stjarnan mín skilaði tveimur skrautlegum afkvæmum okkur til mikillar ánægju.Hún þurfti reyndar smáhjálp en ég hafði auðvitað bara gaman að því .

 

 

 

 

 

 

 

 

 

 

 

Skrudda litla var ótrúlega dugleg og áhugasöm þrátt fyrir ungan aldur og vildi alltaf með mér í fjárhúsin. 

 Um miðjan dag var hún oft orðin svo þreytt að hún sofnaði fram á eldhúsborðið hjá frænda sínum. En allt tekur enda og það gerði þetta sauðburðarfrí líka og Jökuldalurinn var kvaddur með sárum söknuði eins og oft áður. 

 

 

 

Góða nótt