Vor óskast....

Gott og blessað fimmtudagskvöld !

Síðustu daga hefur svo sannarlega verið vor í lofti hér norðan heiða sem og á fleiri stöðum. Snjórinn hvarf á nokkrum dögum og götur og bílaplön urðu auð og þurr, eitthvað sem hefur ekki sést síðan snemma í haust. Prjónabrókinni var lagt í flýti og kvartbuxurnar dregnar fram í skyndi. Hægt var að fara út án þess að dúða sig í dúnúlpu, trefil,loðhúfu og tilheyrandi,já og jafnvel vera berfættur í skónum . Yndislegt, sannkallað vor í lofti. Var á tímabili að hugsa um að draga fram kaststöngina og æfa köstin aðeins, ekki veitir af. Munaði líka minnstu að sparihjólið yrði dregið fram en áður en ég komst svo langt fóru veðurguðirnir aftur í vetrarham og viti menn nú er allt komið á kaf aftur og norðangolan blæs sem aldrei fyrr . Prjónabrókin er aftur komin fram í dagsljósið og dúnúlpan fær varla nokkurt frí. Hvernig er þetta eiginlega átti öskudagur ekki bara átján bræður ???? Eða voru einhverjir getnir á laun sem eru að stíga fram í dagsljósið núna ? Ég bara spyr  !

En við getum alltaf látið okkur dreyma um sól og sumar !

 

 

 

Athugasemdir

[JEG, 26.3.2009 kl. 22:20]

Eiga þessir bræður ekki bara orðið börn ????

Knús norður til þin. 

[Sigrún Óskars, 28.3.2009 kl. 10:20]

Það er nú bara mars ennþá  það hlýtur samt að fara að "vora" fuglarnir eru að týnast til landsins og páskar handan við hornið.

Kveðja norður í skaflanna

[Ásta Óskarsdóttir (IP-tala skráð) 29.3.2009 kl. 15:28]

Var ekki snjór hérna 11. maí í fyrra? Maður fer bara alvarlega að hugsa um að kaupa sér 10 tíma ljósakort í Stjörnusól eins og ég gerði mikið um 14 ára aldurinn.  Við verðum víst að sætta okkur við það að þetta er bara snjóbær og því meiri snjór því fleiri skíðatúristar og þá því meiri peningur handa akureyskum verslunarmönnum.   Ég ætla samt ekki að segja mikið, var að draga upp ullarsíðbuxurnar aftur og setja pæjuskóna upp í skáp...  ætlar þetta engan endi að taka? Kær kv. Ásta nágranni.