Allir syngja á öskudaginn.

25.2.2009 | 17:09

Öskudagurinn rann upp bjartur (fyrir utan smá él ) og fagur (alltaf fagurt á öskudaginn).

Öskudagsgengið mitt (heimasætan ásamt tveimur góðum vinkonum)var mætt í hús uppúr klukkan sjö til undirbúnings.

Í gær var reyndar mikið uppnám á heimilinu því eitt trúðsnefið gufaði upp og fannst ekki þrátt fyrir mikla leit. Það voru því góð ráð dýr og á sjötta tímanum í gær fór mamma gamla á stúfana til að fjárfesta í nýju nefi. En það var sama hvað búðin hét,allsstaðar voru rauðnefin uppseld. Þá var tekið það ráð að hringja í vini og kunningja og kanna trúðsnefjalager þeirra. Seint og síðar meir eftir að hálfur bærinn hafði verið á hvolfi við að leita kom svo símtalið sem beðið hafði verið eftir.....Það fannst trúðsnef í næstu götu. Öskudeginum var reddað og trúðarnir litlu gátu tekið gleði sína á ný Smile .

Í býtið í morgun var síðan lagt af stað í söngferðalag um bæinn í gervi Síamstrúða.

Stefnan var fyrst sett á flugvöllinn, síðan á sjúkrahúsið, þá var Eyrin skönnuð og svo miðbærinn. Eftir góða útiveru með kuldabola var bankað uppá á Glerártorgi en þar fór fram söng og búningakeppni. Trúðarnir tróðu að sjálfsögðu upp og viti menn þeir rúlluðu þessu upp og unnu fyrstu verðlaun í búningakeppninni hjá hópunum. Glæsilegt það Smile .

Hlýtt Glerártorg var kvatt með virktum og medalíu um hálsinn og stefnan tekin á sjálfa Brekkuna því enn átti eftir að heimsækja nokkra góða staði. Að því loknu var ákveðið að seðja sárasta hungrið og bjóða trúðunum glæsilegu á Subway. Þá var dagurinn langt kominn, nammitaskan orðin troðin og trúðarnir þrír orðnir meira en sáttir við afrek dagsins.

Þá var bara eftir að skipta góssinu og það er nú eins gott að skipta jafnt á milli þegar síamstrúðar eiga í hlut.